Psa 55 | MMX | STEP | O Moroa, una ronga na levelinga rak; nemen uta ronga aie xepe lisingising tarak.

Psalms 55

Lisingising At laradi Ua Lentangas Teren Ga Lok Laxaurup Tin

1 O Moroa, una ronga na levelinga rak; nemen uta ronga aie xepe lisingising tarak. 2 Una ronga lising tarak la una vaase porang ia; levenmumuat i lok kapmek tino lorooro rak. 3 Labantuxu rak i lingun tinotno atla limixin munepen minia di kiilu ia. Na limixin kapmek di lok do dina sev amdamda ia mi levenmumuat. Di belemamao ia la dik lox angtungun bok tia. 4 Kuren la nia a marat kapmek tinotno, la lanmarat at lanmet i suxuna ia. 5 Nia a suma rino langsangan lanmarat la a dede; lanmarat i suxa aumsu lorooro rak. 6 A vara rino i do nia gi ruuna tuvapa ngan at lamno; nia giba rava kaxat uto at loxot petpes, la lodoxoma rak gira lok mamana. 7 Nia giba rava uto vaxalom kusu ana nemen mimila ro at lamatbin. 8 Nia giba lok soso ri vuse ka toxot ti lipe, at langsangan lasaii mi lamanman bet. 9 O Leeme Silok, una lox ekarakat levelinga axa atnedi limixin munepen minia. Nia a reven limixin di esep keneng at lemenemen silok, la di lok kapmek tino limixin. 10 At levenaleng kangking la kanimin nia a reven di, dit pas saasa la dik lok leveloklok mamangan la dik paxaru kaxat buaang laxan ekarakat. 11 Leeteke ik lok at levengkot axap; larangas axap i umsu mi lixipkip paxat panga mi laxaxarang ka levempanga at leventaba vetpes.

Laradi Mamalagan Ga Paase Ri Lentangas Teren

12 Dola tara at limixin munepen minia na lok kalise ia, keke i anaba xip tutu mi lumumuat teren; dola ni natlas i mavana rak, anabak lox alipe basinge i. 13 Ketla nenu mun, lentangas tarak, nenu xa uga lok na leveloklok kakapmek tia; la uga emu minia. 14 Amisik neda taga etangas mi lavapaase la taga lotu buru vam to at loogu laplavang. 15 Lisingising tarak keretna; limixin munepen minia dinaba mer avot ti loxonaleng meremet, no ne Moroa ga vit li i ridi. Nia a vara i do dinak mit tooro mene di la dinat pas uto at lemenemen at labarongan, atla laxakapmek i umsu rino xeneng at lebelen di la keneng bok at laraugu bok atnedi. 16 Ketla nenia a ro ke at Leeme Silok ne Moroa ri loklok tooro, la ni naba lox asepsu ia. 17 At lenmaxantamak suubu, at levenaleng kangking la at levenaleng kanimin, nia a velevanga mi levesingising lolos tarak mo i turut saparav i, la ni naba ronga ia. 18 Ni naba lox amlong avukar ia ap mo levenesep nia a vesep teren, la kopmen tepanga naba sep kapmex ia, kantubu atnedi buaang limixin munepen minia. 19 Moroa gam gomgonga na lavatbung menemen, ga ruka axa i ganoxa at lereot, la ni naba ronga ia la ni naba sak tup midi; atla di xopara na repukus, la kopmen dina marat teren. 20 Mo laradi nia aga vemu min, ga esep eburu mi larapentangas teren, ga los polo levengkakaape ren. 21 Levelinga ren ga nunuan aleng, ketla longlong angtungun ga umsu at lebelen, levelinga ren gang sengsen ngan lavarise sepsep. 22 Una ke raba Leeme Silok mi laxanmumuat taram, ni naba tupe u; ni xopmen na ke xepe limixin mokmokso kusu limixin petpes dina sak tup midi. 23 Ketla nenu, O Moroa, unaba lam bubua ka limixin sepsep amet mi limixin kaxarang uto xopok at levenmaaut atnedi at loxonaleng move di aau, la kovisi na epovo rinedi ri met. Ketla nenia, ana nuunu saga ram.